Жиззах вилояти ИИБ ахборот хизматининг маълум қилишича, Шароф Рашидов туманида истиқомат қилувчи шахс жорий йилнинг апрель ойида Ғаллаорол туманида рўйхатда туриб, Зафаробод туманида яшовчи аёл билан танишади.

Улар шу йилнинг июль ойига қадар ўзаро яқин алоқада бўлиб келади. Орадан вақт ўтиб алоқалар узилгач, аёл яна учрашиб, кўнгилхушлик қилишни таклиф қилган. Бироқ рад жавобини олгач икки фарзанднинг онаси қинғир ишга қўл уради.

У йигитнинг ижтимоий тармоқдаги саҳифасидан шахсий фотосуратларини юклаб олади ва уларни монтаж қилади. Аёл ушбу суратларни ижтимоий тармоқларда тарқатиш билан қўрқитиб йигитдан 5 млн. сўм талаб қилади.

Жабрланувчининг бу ҳақдаги мурожаатига асосан, ички ишлар органлари томонидан тезкор тадбир ўтказилади ва аёл талаб қилинган 5 млн. сўмни йигитдан олган вақтда ашёвий далиллар билан қўлга олинди.

Ҳолат юзасидан жиноят иши қўзғатилган.