Давлат фуқаролик хизматчиси томонидан халқаро ва бошқа расмий тадбирларда совға олиш тартиби қандай?  

Ўзбекистон Республикаси Коррупцияга қарши курашиш агентлиги директорининг 11.03.2023 йилдаги 54-сон буйруғи билан “Давлат фуқаролик хизматчиси томонидан хизмат сафарлари, халқаро ва бошқа расмий тадбирлар муносабати билан олиниши мумкин бўлган совға қиймати, шунингдек уни тасарруф этиш тартиби тўғрисида”ги Низом тасдиқланиб, Адлия вазирлигида 13.03.2023 йилда 3425-тартиб рақами билан давлат рўйхатидан ўтказилди.

Мазкур Низомга кўра, давлат фуқаролик хизматчиси Ўзбекистондан ташқаридаги хизмат сафарлари, халқаро ва бошқа расмий тадбирлар, Ўзбекистонда ўтказиладиган халқаро ва бошқа расмий тадбирларда совға олиши мумкин.

Ўзбекистондаги бошқа хизмат сафарларида совға олиш мумкин эмас.

 Давлат фуқаролик хизматчиси оладиган совға қуйидаги талабларга жавоб бериши керак:

-        миллий қонунчилигимизда тақиқланмаган ашёлар бўлиши;

-        совға халқаро ва бошқа расмий тадбирда ихтиёрий берилган бўлиши;

-        совға очиқ ва ошкора қабул қилиниши;

-        давлат органининг обрўсига путур етказмаслиги;

-        манфаатлар тўқнашуви ёки коррупциявий омилни келтириб чиқармаслиги.

Давлат фуқаролик хизматчиси совғани тадбирдан келгандан сўнг 3 иш кунида хўжалик бўлимига беради ва бунда далолатнома тузилади.

Совғанинг қиймати аниқ бўлмаса, хўжалик бўлими уни баҳолайди ва унинг қиймати базавий ҳисоблаш миқдорининг 4 бараваридан (1,2 млн сўмдан) кўп бўлмаса, совға давлат фуқаролик хизматчисига берилади.

Совға қиймати базавий ҳисоблаш миқдорининг 4 бараваридан кўп бўлса, у молия-иқтисод бўлинмаси томонидан давлат органи балансига кирим қилинади ҳамда давлат органи эҳтиёжи учун фойдаланилади.

Тез яроқсиз ҳолга келувчи совғалар (гул, ширинликлар), шунингдек канцелярия тўпламлари (тақвим, буклет, пластмассали ручка, кундалик ва блокнот) совға сифатида расмийлаштирилмайди ҳамда ушбу совғалар давлат фуқаролик хизматчисида қолдирилади.

Мазкур низом талаблари барча давлат фуқаролик хизматчилари учун мажбурий ҳисобланади.

        Бегали ПАКИРОВ                                                   

Шароф Рашидов туман адлия бўлими                       

Юридик хизмат кўрсатиш маркази бош юрисконсульти