Судга келган мурожаат:

Судга келган мурожаат:

Кредит шартномаси бўйича кафил сифатида иштирок этганман. Кредит олувчига банк томонидан 130.000.000 сўм кредит маблағлари ажратилган. Аммо кредитни ўз вақтида тўламаганлиги сабабли суднинг ҳал қилув қарори билан кредитнинг асосий қисми ва фоиз қарздорликни кредит олувчи ва кафиллардан солидар тартибда ундириш белгиланган. Тергов органи томонидан кредит олишда тақдим қилинган ҳужжатлар сохталаштирилганлиги ва кредит маблағлари ўзлаштирилганлиги аниқланиб, жиноят иши қўзғатилган ва тергов ҳаракатлари олиб борилмоқда. Мен терговга жабрланувчи сифатида жалб қилинганман. Шундай бўлсада давлат ижрочиси кредит қарздорликни тўлашни мендан талаб қилмоқда. Бу вазиятда қандай иш тутишим мумкин.

Мурожаатга фуқаролик ишлари бўйича Жиззах туманлараро судининг судьяси Эрмамат Тожибоев жавоб берди:

Ўзбекистон Республикаси Фуқаролик процессуал кодексининг 454-моддасига кўра, суд ҳужжатининг ижросини қийинлаштирадиган объектив ҳолатлар мавжуд бўлган тақдирда, суд ундирувчининг, қарздорнинг ёки давлат ижрочисининг аризасига биноан ҳал қилув қарорининг ижросини кечиктиришга ёхуд унинг бўлиб-бўлиб ижро этилишига йўл қўйишга, уни ижро этиш усули ва тартибини ўзгартиришга ҳақли.

Агар ваколатли давлат органининг қарорида ёки тарафларнинг келишувида бошқача қоида назарда тутилмаган бўлса, суд ҳужжатининг ижросини кечиктириш ёхуд бўлиб-бўлиб ижро этиш учун кўпи билан бир йил муддат берилиши мумкин.

Сиз тергов ҳаракатлари олиб борилаётган жиноят иши якунлангунига қадар ёки маълум бир вақтга қадар ҳал қилув қарорининг ижросини кечиктириш ҳақида судга мурожаат қилишга ҳақлисиз.